د خيبر پښتونخوا په ټانک ضلع کې د مې پر څلورمه په وسلوال بريد کې يو پوځي وژل شوی دی.
په ټانک کې د استخباراتي اداري يو چارواکی د نوم نه خپرولو په شرط مشال راډيو ته وويل چې نامعلومه وسلوالو په کوټ اعظم کې د پوځ پر ګاډو برید وکړ چې په نتيجه کې يو پوځي وژل شوی.
د هغه په خبره د وژل شوي سرتېري نوم نايک مجاهد وو. د پېښې وروسته امنيتي سرتېرو په سيمه کې د لټون عمليات پيل کړي دي. د هغه برید ذمه واري کومې وسلوالې ډلې نه ده منلې.
دا په داسي حال کې ده چې د ټانک د امن جرګې په وروستيو کې په هغه ضلعې کې پر امنيتي حالاتو اندېښنې ښوولې وي. د دوی په وينا حکومتي چارواکي او امنيتي ادارې د ناامنۍ د مخنيوي لپاره کوټلي اقدامات نه کوي. بلخوا د پاکستان پوځ، د خیبر پښتونخوا پولیس او حکومت وايي چې د وسلوالو پر ضد هدفي عملیاتو روان دي.