د سوات پولیس وايي په ناموسي وژنه کې ښکېل یو ځوان یې نیولی دی.
د سوات د پولیسو ویاند معین فیاض د مې پر شپږمه مشال راډیو ته وویل د مینګورې د رحیم اباد کلي ولي خان خپله خور د غیرت په نامه وژلې ده، پولیس وايي، د وژلې شوې مېرمنې څلور ماشومان هم دي او دا مېرمن دوه ورځې وړاندې له دارلامانه کورته ستنه شوې وه.
د پولیسو په وینا د دغې مېرمنې د خپل خاوند سره کورنۍ شخړه وه نو ځکه یې دارلامان ته پناه وړې وه.
د پولیسو ویاند معین فیاض وايي د پولیسو په مدعیت کې د ولي خان پر ضد مقدمه درج شوې او پلټنه روانه ده.
د پولیسو په وینا په سوات کې په تېرو څو ورځو کې څلور مېرمنې وژل شوې دي چې دوه یې د ناموسي وژنې ښکار شوې دي.
په سوات کې د "دي اوېکنېنګ" یا بیدارۍ په نوم د ښځو د حقونو لپاره کارکوونکې یوه ناحکومتي ټولنه وايي، په هغه سیمه کې وخت په وخت نجونې د ناموس په نوم وژل کېږي. هغه ټولنه زیاتوي چې د روان کال له پیل راهیسې په سوات کې ۱۷ ښځې او نجونه وژل شوې دي.
په پاکستان کې د دوامداره ټولنیز پرمختګ په نوم د ښځو او ماشومانو د حقونو لپاره کارکوونکي ناحکومتي سازمان د روان ۲۰۲۵ کال د فرورۍ پر ۲۸مه په خپل راپور کې ویلي وو چې په ۲۰۲۴ کال کې په پاکستان کې پر ښځو د تشدد ۳۲،۶۱۷ پېښې ثبت شوې وې. په هغه راپور کې راغلي چې په ۲۰۲۴ کال کې نارينوو په ټول هېواد کې ۵۴۷ ښځې وژلې وي چې ۱۳۴ یې د خیبر پښتونخوا اوسېدونکې دي. هغو قاتلينو خپلو وژنو ته د غیرت نوم ورکړی دی.
